Вечерва во 21 часот во Expo павиљонот 2 во Тел Авив ќе се одржи втората полуфинална вечер на годинашниот избор за Песна на Евровизија.
На програмата се настапите на 18 земји учеснички, по следниов редослед: Ерменија, Ирска, Молдавија, Швајцарија, Летонија, Романија, Данска, Шведска, Австрија, Хрватска, Малта, Литванија, Русија, Албанија, Норвешка, Холандија, Македонија, Азербејџан.
Според нашите предвидувања, пласман во финалната вечер треба да обезбедат: Ерменија, Швајцарија, Шведска, Малта, Русија, Норвешка, Холандија, Македонија и Азербејџан и евентуално Данска или Летонија. Треба да се нагласи дека оваа втората е многу поквалитетна од првата полуфинална вечер.
Покрај државите кои ќе настапат, свои гласови ќе доделат и: Италија, Германија и Обединетото Кралство кои се дел од големата петорка.
Стручното жири (кое веќе гласаше синоќа) составено од пет члена ќе учествува во 50% од добиените поени за секоја држава, а останатите 50% од гласовите ќе се добијат од телефонските јавувања на гледачите.
Во текот на паузите пред гласањето и во неофицијалната програма, планирани се настапи на поранешни победници на изборот за Песна на Евровизија: Дана Интернешнл, Кончита Вурст и Манс Зелмерлоу...
Во финалната вечер предвиден е настап на поп иконата Мадона која ќе изведе две песни чии наслови се чуваат како најстрога тајна.
Ексклузивно за ИДИВИДИ од Тел Авив, Илија Николовски