Каква ноќ, какво шоу, каква атмосфера, ова не се опишува, ова само се доживува е првиот коментар после финалето на изборот за Песна на Евровизија. Тамара со Proud во име на Македонија го однесе целиот светски аудиториум во друга димензија. Покажа и докажа дека помалку е повеќе.
Со минималистички пристап оствари максимален ефект. Го освои осмото место што е еднакво на победа. Докажа дека и ние можеме, знаеме и сакаме.
Освоени 295 поени таа ги доби како второпласирана од стручното жири на кои беа додадени поените од телевоутингот.
Инаку победник на 64-иот избор на Песна на Евровизија е Данкан Лоренс од Холандија со песната Arcade, кој освои 492 поени.
-Се радувам што победив, иако во текот на настапот бев многу нервозен. Вечерва победи музиката и тоа е најважно, изјави тој после победата.
Како и Тамара и Данкан отпеа минималистичка балада. Инаку Холандија и Македонија ги освоија првото и второто место во второто полуфинале.
Второто место во финалето го освои Италија, третото Русија, а натаму следуваат: Швајцарија, Норвешка, Шведска, Азербејџан, Македонија, Австралија, Исланд, Чешка, Данска, Словенија, Франција, Кипар, Малта, Србија, Албанија, Естонија, Сан Марино, Грција, Шпанија, Израел, Германија, Белорусија и Обединетото кралство.
Ненадминливото шоу беше збогатено со поранешни евровизиски победници и со настапот на Мадона.
Ексклузивно за ИДИВИДИ од Тел Авив: Илија Николовски