„Финалист број 6-Македонија!” е реченицата која ја чекавме да биде изговорена четири години. После толкава пауза, Македонија успеа да се пласира во финалната вечер на изборот за Песна на Евровизија и да биде горда на успехот. Моќната интерпретација на „Црно и бело” испрати енергија од емоции кои очигледно никого не оставија да се чувствува рамнодушно. Тоа го потврдија силните аплаузи и извиците на одушевување во текот на настапот.
„Многу сум задоволна и горда сум што ја претставувам Македонија. Пласманот во финале е успех за сите нас, успех за Македонија”.
Во однос на изгледот, Калиопи беше во свој елемент. Носеше црн Армани костум со тесни панталони и филигран на десната рака. Шминката беше светла и ја истакнуваше свежината и живоста на нејзиното лице. Ништо не беше нагласено и се беше во функција на интерпретацијата што на крај се покажа како успешен потег. Сето ова треба да се потврди и утре на финалната вечер кога Македонија ќе настапи под реден број 22.
И втората полуфинална вечер помина речиси без изненадувања, но понуди поквалитетни песни во однос на првата. Започна еуфорично и со многу енергија. Дозирањето го започна Жељко Јоксимовиќ со „Није љубав ствар” за Србија, а кулминираше со настапот на Калиопи и „Црно и бело”. Нашата разгледница беше насловенa „Baku-city of culture”. По настапот на Македонија, следуваше мало затишје кое го разбија: Малта, Украина и особено Швеѓанката Лорен со „Euphoria”. Едноставни настапи со убедлива интерпретација имаа От Лепланд од Естонија со песната „Kuula” и Маја Сар од Босна и Херцеговина со „Кораке ти знам”. Овие две балади колку повеќе ги слушате толку повеќе влегуваат под кожа.
По 15-минутната пауза за телефонско гласање, следеше кратка шоу програма. За неа упатуваме комплименти до домаќините, бидејќи на иста сцена ги доведоа евровизиските победници од последните пет години: Марија Шерифовиќ-Србија, Дима Билан-Русија, Александар Рибак-Норвешка, Лена Маер Ландрут-Германија и Ел и Ники од Азербејџан. Тие отпеаа дел од победничките песни во нов аранжман, а на крајот заеднички ја изведоа „Waterloo” на ABBA.
Според прогнозата на ИДИВИДИ осум од десетте земји: Босна и Херцеговина, Естонија, Србија, Турција, Норвешка, Украина, Шведска и Македонија, заедно со Литванија и пријатното изненадување Малта, обезбедија пласман во финалната вечер. Белорусија заслужи финале, но не и Хрватска, Словачка, Словенија, Бугарија, Грузија. Холандија, Португалија.