Шест концерти еден по друг! По теркот на светските музички ѕвезди, нашата поп кралица Каролина синоќа го започна маратонот со кој прави концертна промоција на својот нов албум „Македонско девојче 2“.
Интимна атмосфера, девет музичари, сцена во стилот на кабаре и преполна сала беа доволни за Каролина цели два часа да не маѓепса со својот глас и емоцијата која успеа да ни ја пренесе. Црни пантолони со висок струк, шешир под кој се криеше бујната коса во ретро стил, кошула во боја на смарагд и неверојатна елеганција – вака едноставно може да ја опишеме нашата најпозната пејачка, која синоќа во голем стил го отвори својот концертен маратон.
Во преполната сала на МОБ синоќа ги слушнавме прекрасните мелодичните звуци на „Вези вези", „Смеј ми се смеј", „Чалгиска", „Две лири", „Кој да ми запее", „Сакам да не те сакам“, „Ќе пијам љубов до крај", „Сон", „Те видов и се заљубив", песни од нејзиниот најнов албум „Македонско девојче 2", зад кој стои Никола Мицевски, кој синоќа и беше десната рака на Каролина свирејќи на пијано и хармоника.
Поп ѕвездата имаше одлична комуникација со публиката, која заедно со неа ги потпевнуваше песните и ја даруваше со громогласно ракоплескање.
Каролина за само два часа успеа да докаже дека без конкуренција можеби е најдобрата пејачка во државата, бидејќи со само неколку професионални музичари и без ниту еден пратечки вокал, ги отпеа песните и успеа да ја пренесе целата енергија на публиката.
Инаку, бидејќи се распродадени сите влезници за петте промотивни концерти на Каролина за проектот „Македонско девојче 2“, Авалон продукција одлучи да додаде дополнителен 6-ти концерт во вторник за кој влезниците се веќе во продажба преку продажната мрежа на www.kupikartizase.com.