Даниел Кајмакоски можеби има трема пред настапите, но е вистински ѕвер кога ќе излезе на сцената.
Неговата моќна изведба во текот на сите настапи и во финалето на X Factor заслужено му го донесе првото место во ова натпреварување. Победата му донесе неизмерна среќа, многу солзи и еуфорија.
-Не ми текнуваат зборови...го чекав овој момент кога мајка ми и татко ми ќе бидат горди...Се чувствувам многу добро..среќен сум, изјави возбудениот Даниел.
Даниел ги изведе „Sex on fire“ од Kings of Lion, „Angels“ од Роби Вилијамс, „Тhe Hardest Thing“ од Тоше, а за крај ја запеа „Red“ со која впрочем и го започна своето настапување во шоуто.
Тамара Милановиќ која влезе во конечниот дуел со Кајмакоски, се задоволи со второто место, додека Маид излезе трет.
При првиот пресек на гласовите од публиката шоуто го напуштија Doktori и Лукијан Ивановиќ.
-Не сум разочаран! По ова за мене започнува вистинската музика, изјави Лукијан и додаде дека тоа што излегол од шоуто не значи дека е помалку важен. За него искуството од X Factor e важна животна школа која многу ќе му помогне во градењето на музичката кариера. Но, сепак призна дека по овие настапи му е потребен одмор, да си ги наполни батериите за да започне со исполнувањето на својот сон.
За разлика од Ивановиќ, Doktori, беа малку тажни бидејќи искрено се надеваа на влез во финалето. Најавија продолжување на соработката со Кристина Ковач и открија дека тие и понатаму ќе останат како група. Нивниот фаворит за победник беше Маид, кој на крајот, сепак го освои третото место.