Синоќа Даниел Кајмакоски ја заокружи најуспешната година во својот живот. Откако победи на најпопуларното регионално натпреварување X-Factor и се стекна со неверојатно голема популарност во Македонија, но и во земјите од поранешна Југославија, тој синоќа триумфираше и на Скопскиот Фестивал што значи дека ќе ја претставува Македонија на Евровизија во Виена следната година.
Кајмакоски победи со песната „Лисја есенски“ откако освои вкупно 22 поени од телефонското гласање и стручното меѓународно жири во сооднос 50-50. Победата не само што му овозможи светска слава преку настапот на Евровизија, туку најпопуларниот пејач на младата генерација доби и парична награда во износ од 20.000 евра.
Второто место со 20 поени и припадна на Тамара Тодевска која ја отпеа композицијата „Брод што тоне“ и доби 15 илјади евра, додека третопласирана беше Еги со „Да не те сакам“ за која освои 18 поени и 10 илјади евра.
На овогодинешниот Скопски Фестивал кој го водеше актерот Васил Зафирчев беа изведени вкупно 20 композиции од познати македонски пејачи во придружба на ревискиот оркестар на МРТ, како Викторија Лоба, Димитар Андоновски, Јоце Панов, Александар Тарабунов и Тони Михајловски, Нина Јанева, Мијата...
Инаку јубилејното 60-то издание на Евровизија ќе се одржи во Виена, Австрија. Според најавите од таму полуфиналиња ќе се одржат на 19 и 21 мај, додека финалето е планирано да се одржи на 23 мај 2015 година. Годинава во музичкиот натпревар победи Кончита Вурст со „Rise Like a Phoenix“. Да се надеваме дека Даниел ќе влезе во финалето и ќе го поправи нашиот пласман од минатите години.