Уште една успешна година за македонската музика и за домашните изведувачи.
Седмото издание на Македонскиот радиски фестивал ги додели наградите за најслушани песни и интерпретатори во измината година. Од она што можевме да го видиме вчера вечер во Универзалната сала, македонската публика уште еднаш го направи најдобриот избор.
Тамара Тодевска и нејзината „Тажна љубов, среќна песна“ ја однесоа наградата за Апсолутен радиски хит за 2014-та.
Пејачката доби 60.000 денари како и бесплатно користење на Универзална сала за солистички концерт. Песната беше наградена и во категоријата најдобар текст, награда која му припадна на Игор Џамбазов.
„Мандарина“ на Влатко Лозаноски е прогласена за Радиски хит според публиката, за што Лозано доби парична награда од 30.000 денари.
Вечерта помина во добро расположение благодарение на одличните настапи како и на спонтаните моменти кои што се случуваа на сцената. Хрватската ѕвезда, Нина Бадриќ, имаше симпатична изведба заедно со детенце од публиката, додека црногорскиот пејач Бојан Маровиќ понесен од емоциите клекна на колена.
Даниел Кајмакоски сосема заслужено ја доби наградата за Идол на нацијата, по што ја изведе „Лисја есенски“, победничката песна со која што ќе не преставува на Евровизија.
Сосема за крај, тој и Бадриќ, во дует ја запеаја „Jedan od mnogih“ од Оливер Драгоевиќ. По завршувањето на фестивалот во Универзалната сала, забавата продолжи во ноќниот клуб „Театро“.