Втората епизода од музичкото реално шоу X-Factor Adria, ја прикажа шареноликоста на талентот од целиот регион, но ја откри и склоноста на жирито кон одреден вид на музика.
Пред Жељко Јоксимовиќ, Масимо Савиќ, Александра Ковач и Тончи Хуљич се најде тешка задача, да одлучат кој ќе помине понатаму во шоуто помеѓу големиот број на пријавени пејачи и пејачки.
- Увери ме во тоа што сакаш да ми го кажеш уште на почетокот, изјави Масимо и така им даде до знаење на кандидатите дека му е најбитна искрената и квалитетната интерпретација на песната.
И во втората епизода на сцената застана талентиран кандидат од Македонија. Имено, синоќа се претстави битолчанката Марија Груеска која веднаш ги освои симпатиите на жирито и публиката.
Марија освен тоа што најпрво фасцинираше со својот заводнички изглед, таа ги остави без збор познатите пејачи од жирито откако испеа песна од филмот „Who framed Roger Rabbit“.
- Иако сакам мажи, морам да признам дека и тоа како добро ме заведе, рече Александра по настапот на Марија.
Марија го оживеа џезот на сцената и одлично ја испеа песната. Таа од сите доби позитивни коментари, а Тончи сепак додаде дека му е жал кога некој го расипува својот пејачки талент пеејќи џез бидејќи од тоа никогаш нема да има леб.
Впечатлив беше и кандидатот кој е роден во Конго, Џонатан, кој успеа да го разигра жирито и на сцената ги оживеа своите звуци од родната земја. Иако помина на сметка на шармот, вети дека следниот пат ќе пее на српски бидејќи ужива во Србија и таму добро си поминува.
Голема прашина се крена околу младиот загрепски учител – под уметничко име Леоне Павлашиан кој настапи облечен во женска облека во стилот на Лејди Гага. Тој до крајот на настапот се соблече и остана само во ланци. Александра беше толку воодушевена од неговиот настап па дури му отпеа и песна. Тончи не го делеше нејзиното воодушевување и неговиот настап го искоментира дека за него било само пауза помеѓу кандидатите кои знаат да пеат.
Седумнаесетгодишната Ива Чуриќ ја затвори втората епизода од шоуто и воодушеви со изведбата. Жирито коментираше дека можат да ја слушаат со часови. Масимо ја советуваше да поработи на гитарата, додека вокалот е перфектен.