"Veçernje novosti": Boris Tadiq do të kandidohet për sekretar të përgjithshëm të KB-sëBeograd, 31 korrik 2015 (MIA) - Ish-presidenti serb dhe lider i Partisë socialdemokrate Boris Tadiq planifikon të kandidohet për sekretar të përgjithshëm të Kombeve të Bashkuara, bëri të ditur gazeta e Beogradit "Veçernje novosti".
Sipas informacioneve jozyrtare nga burime diplomatike, Tadiq i shfrytëzon lidhjet e vjetra dhe lobon për kandidaturën e tij, ndërsa kohë më parë ka kërkuar mbështetje edhe nga Franca.
Këshilltarja e Tadiqit, Marina Komad deklaroi se informacionet e tilla janë spekulime mediale.
"Boris Tadiq nuk ka menduar që të kandidohet për sekretar të përgjithshëm të KB-së. Aktiviteti i ri politik është orientuar para së gjithash ndaj politikës së brendshme dhe veprimit opozitar", theksoi Komad.
Edhe Tadiq deklaroi se nuk planifikon të kandidohet për sekretar të përgjithshëm të KB-së, duke vlerësuar se këto janë dezinformime të "mediave të regjimit" të cilët tentojnë ta dobësojnë opozitën.
|