Presidentja e Kosovës Jahjaga për vizitë dyditore në Shqipëri

Tiranë, 9 shtator 2015 (MIA) - Presidentja e Kosovës, Atifete Jahjaga nesër do të udhëtojë për një vizitë zyrtare në Shqipëri, ku do të takohet me zyrtarë të lartë shtetërorë, njoftojnë mediat kosovare.

Jahjaga do të vizitoj Shqipërinë me ftesën e presidentit shqiptarë, Bujar Nishani dhe do të mbërrijë në Presidencë në orën dhjetë, kohë kur do të organizohet edhe ceremonia zyrtare e mirëseardhjes.

Sipas agjendës të publikuar nga Zyra për media e Presidencës së Shqipërisë, Nishani e Jahjaga, do të kenë një takim të përbashkët gjysëm orësh, ndërkohë që delegacionet do të kenë një takim midis tyre dhe  më pas vijon konferenca e përbashkët për shtyp.

Jahjaga pritet të takohet edhe me kryeministrin e Shqipërisë Edi Rama, me kreun e Parlamentit Ilir Meta dhe me liderin e opozitës Lulzim Basha.