Çaushogllu: Turqia nuk do t'i kërkojë falje Rusisë

Ankara, 26 nëntor 2015 (MIA) - Turqia nuk do t'i kërkojë falje Rusisë për shkak të rrëzimit të aeroplanit ushtarak rus, deklaroi sot ministri turk i Punëve të Jashtme, Mevlut Çaushogllu.

"Nuk duhet të kërkojmë falje për diçka që kemi të drejtë", theksoi Çaushogllu.

Ai përkujtoi se Turqia dje ka shprehur keqardhje për shkak të incidentit, duke shpjeguar se bëhet fjalë për bisedë telefonike midis shefit të diplomacisë turke dhe homologut rus, Sergej Lavrov.

Deklarata e Çaushogllut vjen pasi presidenti rus, Vlladimir Putin ka theksuar se Turqia akoma nuk ka kërkuar falje për shkak të rrëzimit të Su-24 rus para dy ditësh në afërsi të kufirit turko-sirian, dhe nuk ka ofruar garanci se "përgjegjësit për këtë krim" do të dënohen.