Kinezët e morën nën koncesion aeroportin në Tiranë

Tiranë, 25 prill 2016 (MIA) - Kompania kineze "China Everbright" ka zyrtarizuar marrjen nën koncesion të Aeroportit të Rinasit në Tiranë.

"Përmes një deklarate zyrtare, grupi kinez njoftoi se ka nënshkruar marrëveshjen me "Tirana Airport International", që i jep asaj të drejtën e koncesionit të aeroportit të Tiranës deri në vitin 2027".

Kompania nuk ka zbuluar shifrat e transaksionit, por ka bërë të ditur se aeroporti do të menaxhohet nga "Ken Dynamics", një konsorcium që ajo e ka formuar së bashku me "Friedman Pacific".

"China Everbright" e cilëson Rinasin si një nga aeroportet me rritjen më të shpejtë në Europë dhe thotë se ai është e para e një serie blerjesh që ajo do kryejë jashtë Kinës, theksojnë mediat lokale.