Komiteti i Monitorimit të APKiE-së mblidhet për herë të parë në ShqipëriTiranë, 22 shtator 2016 (MIA) - Komiteti i Monitorimit i Asamblesë Parlamentare të Këshillit të Evropës u mblodh për herë të parë në Shqipëri në një takim me temë "Dialogu dhe Toleranca Ndërfetare".
Takimi, i organizuar nga Kuvendi i Shqipërisë, bëri bashkë përfaqësues nga 47 vende anëtare të APKiE-së.
Në fjalën hapëse, nënkryetarja e Kuvendit të Shqipërisë, Valentina Leskaj bëri një prezantim të punës të parlamentit shqiptar, duke e vënë theksin tek reformat e ndërmarra dhe veçanërisht ndryshimet kushtetuese, të cilat i hapin rrugë sundimit të ligjit në vend, njofton ATSH.
"Parlamenti është seriozisht i angazhuar në fushën e reformës në drejtësi, një nga reformat më të mëdha e më të thella të 25 viteve demokraci. Kemi kaluar me konsensus paketën e reformës kushtetuese më 21 korrik, e cila falë përkushtimit personal të kryetarit të Kuvendit, si rrallë ndonjëherë, u miratua në mënyrë unanime me të gjitha votat e parlamentit", tha Leskaj.
Po ashtu, ajo e vuri theksin dhe tek miratimi i ligjit të vetingut në muajin gusht, ndërsa shpejt do të kalojmë dhe ligjin "Për pushtetin gjyqësor" dhe atë të Prokurorisë e më pas me plotësimin e paketës së plotë, paralel me disa reforma të tjera, tha Leskaj.
Nënkryetarja e Kuvendit u ndal edhe te çështja e barazisë gjinore në Kuvend, duke theksuar se "Parlamenti shqiptar përbëhet nga 140 deputetë nga të cilët 32 janë gra, numri i grave është dyfishuar në raport me legjislaturën e fundit po kemi ende rrugë për të bërë.
Pas fjalës së nënkryetares Leskaj, Komiteti i Monitorimit i APKiE-së, i vazhdoi punimet duke diskutuar mbi Raportin e Këshillit mbi Moldavinë, Turqinë, Maqedoninë dhe çështje të tjera të komunitetit si raporte periodike mbi vendet në monitorim.
|