Turqia e vazhdon gjendjen e jashtëzakonshme në vendAnkara, 29 shtator 2016 (MIA) - Këshilli për siguri kombëtare i Turqisë kërkoi vazhdim të gjendjes së jashtëzakonshme në vend, që u vendos para tre muajve, pas tentimit për grusht shtet më 15 korrik, transmeton BTA.
"U vendos që Qeverisë t'i rekomandohet ta vazhdojë gjendjen e jashtëzakonshme që në mënyrë efikase të garantohen mbrojtja e demokracisë tonë, shteti ligjor, si dhe të drejtat dhe liritë e qytetarëve tonë", theksohet në kumtesën e Këshillit pas seancës në pallatin presidencial në Ankara.
Vendimi i Këshillit për siguri kombëtare u prit pasi presidenti Rexhep Taip Erdogan e vendosi idenë e tillë, njoftojnë mediat britanike.
Gjendjen e jashtëzakonshme në vend, Erdogani e shpalli më 20 korrik, kur deklaroi se ajo, autoriteteve do t'u ndihmojë të marrin masa të shpejta kundër përgjegjësve për tentimin për grusht shtet.
Këshilli për siguri kombëtare, gjithashtu, rekomandoi që 15 korriku çdo vit të shënohet si Dita e demokracisë dhe lirive.
|