Han i rekomandon Prishtinës dhe Beogradit që të mos e rrezikojnë atë që është arritur

Bruksel, 16 janar 2017 (MIA) - Komisari evropian për negociata dhe zgjerim dhe politikë fqinjësore Johanes Han sot në Bruksel i ka bërë thirrje Kosovës dhe Serbisë që të mos e rrezikojnë atë që është arritur paraprakisht me dialogun.
"Lutja ime është që të mos vihet në rrezik ajo që deri më tash është realizuar në dialogun Beograd-Prishtinë dhe se duhet shikuar përpara e jo pas", deklaroi Han para fillimit të takimit të shefave të diplomacive të vendeve të BE-së duke u përgjigjur në pyetjen si e sheh tensionin ndërmjet Kosovës e Serbisë pas "rastit treni".
Në pyetjen nëse presidenti i Serbisë, Tomisllav Nikoliq shikon pas, Han u përgjigj: Secili që nuk shikon përpara, shikon pas".
Në këtë takim nuk është paraparë ndonjë debat për Ballkanin Perëndimor ose për zgjerimin.