Mustafa: Qeveria e Kosovës e përkushtuar për zbatimin e marrëveshjeve të dialogut me SerbinëPrishtinë, 18 janar 2017 (MIA) - Kryeministri Isa Mustafa, theksoi sot se "qeveria e Kosovës është e përkushtuar për zbatimin e marrëveshjeve nga dialogu dhe atë të Asociacionit të komunave me shumicë serbe". Në fjalën e tij në mbledhjen e qeverisë Mustafa tha se "do të fillojmë me zbatimin e saj në harmoni me vendimin e Gjykatës Kushtetuese, por me pjesëmarrje të serbëve dhe të komuniteteve të tjera në ketë proces". Kryeministri Mustafa i ftoi serbët e Kosovës që të kthehen në institucione, në qeveri dhe kuvend, që të punojnë bashkërisht për të ardhmen e qytetarëve të Kosovës pa asnjë dallim. Ai i siguroi qytetarët e Kosovës se provokimet e shtetit serb siç ishte rasti me trenin ilegal, do të gjejnë gatishmërinë dhe vendosmërinë e qeverisë së Kosovës për të zbatuar ligjshmërinë në vend, në koordinim me Bashkësinë Ndërkombëtare. "Qeveria e Kosovës është e përkushtuar për të zbatimin e marrëveshjeve nga dialogu dhe marrëveshjen për Asociacionin e Komunave me shumicë Serbe. Kreu i qeverisë i bëri thirrje autoriteteve lokale në Mitrovicën Veriore, që të zbatojnë ligjet e Kushtetutës së Kosovës për murin e ndërtuar pa leje, transmeton Kosovapress. Sipas tij, muri i ngritur në mes të qytetit të Mitrovicës nuk është as e tashmja dhe as e ardhmja e qytetarëve të Kosovës. Kryeministri kosovar Mustafa ka folur edhe për kryetarin e AAK-së, Ramush Haradinaj, i cili po vazhdon të qëndrojë në Francë pas lirimit me kusht. Ai tha se Haradinaj nuk do të ekstradohet në Serbi, por do të kthehet në Kosovë.
|