Të hënën vazhdim i seancës konstitutive të Parlamentit të KosovësPrishtinë, 11 gusht 2017 (MIA) - Kuvendi i Kosovës përmes një komunikatë për media ka njoftuar se vazhdimi i seancës konstituive do të mbahet të hënën, duke filluar nga ora 10:00. Në rende ditë do të jetë zgjedhja e kryetarit dhe nënkryetarëve të Kuvendit të Kosovës. Pas dy muajsh prej mbajtjes së zgjedhjeve të përgjithshme të parakohshme në Kosovë, Kuvendi më 3 gusht e filloi seancën konstituive, por që deri më tani nuk ka arritur ta përfundojë me sukses. Kandidati për kryeministër të Kosovës, Ramush Haradinaj, i nominuar nga koalicioni i Partisë Demokratike të Kosovës, Aleancës për Ardhmërinë e Kosovës dhe Nismës për Kosovën, i njohur si koalicioni PAN, në një intervistë për Radion Evropa e Lirë, thotë se Kosova brenda 10 ditëve të ardhshme do të ketë institucionet e reja. Haradinaj thotë se me mbështetjen e partisë politike Aleanca Kosova e Re, Kosova do të ketë një Qeveri gjithëpërfshirëse. Ai thotë se kandidati i vetëm për postin e kryetarit të Kuvendit të Kosovës është Kadri Veseli.
|