Varroset Bajram RexhepiMitrovicë, 22 gusht 2017 (MIA) - Me nderime te larta shtetërore, qytetarë nga Mitrovica dhe Kosova, sot pasdite i dhanë lamtumirën e fundit kryeministrit të parë të Kosovës, Bajram Rexhepi në varrezat e fshatit Shipol. Kryetari i PDK-së, Kadri Veseli me këtë rast tha sot janë këtu për t’u ndarë nga një njeri të madh si ish kryeministër. “Kemi humbur njeriun i cili veshi uniformën e UÇK-së për shërimin e tyre si kirurg. Duhet të ndiqet ky shembull i Rexhepit për të çuar vendin përpara. Sa herë të flitet për emrin e tij do të flitet edhe për Mitrovicën. Nga sot Rexhepi është monument i shtetit të Kosovës”, tha Veseli. Agim Bahtiri, kryetar i Mitrovicës në ceremoninë e varrimit tha se Rexhepin e ka njohur në kohërat më të vështira si mantel bardhë. “Rexhepi ishte një njeri që ka dëshiruar lirinë dhe bashkimin e këtij vendi”, tha Bahtiri. Ai shtoi se ndër atributet e tij Rexhepi ishte edhe njeri i unitetit, i cili bëri shumë për vendin. “Rexhepi e deshi Mitrovicën, i ndihmoi edhe mitrovicasve si kirurg, për ushtarët e lirisë dhe qytetarët e saj”, tha kryetari i Mitrovicës. Bahtiri propozoi që rrugës nga liqeni akumulues t’i vihet emri "Bajram Rexhepi".
|