Paralajmërohet vazhdim i ri i gjendjes së jashtëzakonshme në Turqi Ankara, 13 tetor 2017 (MIA) - Partia turke në pushtet e Drejtësisë dhe Zhvillimit (AKP) njoftoi se vijon vazhdim i ri i gjendjes së jashtëzakonshme, të vendosur në vend pas tentimit të grusht shtetit. Sipas procedurës, vendimi fillimisht do të shqyrtohet në seancën e Këshillit për Siguri kombëtare të Turqisë, që do të mbahet deri në fund të kësaj jave. Pritet pastaj Këshilli të dërgojë rekomandim deri te Kabineti. Masa pastaj do të parashtrohet për votim në Parlament. Parlamenti turk në korrik e vazhdoi gjendjen e jashtëzakonshme në vend deri më 19 tetor. Regjimi i gjendjes së jashtëzakonshme i siguron Qeverisë autorizime të gjera, mundëson udhëheqje përmes dekretit, duke anashkaluar Parlamentin dhe jep mundësi për kryerje të arrestimeve dhe pastrimeve masive.
|