Cipras: Greqia nuk do të tolerojë provokime drejt integritetit të saj territorialAthinë, 15 shkurt 2018 (MIA) - Greqia nuk do të tolerojë kurrfarë provokimesh drejt integritetit të saj territorial, deklaroi sot kryeministri grek Aleksis Cipras. Deklarata e Ciprasit pason pas incidentit të së hënës kur u përplasën një anije greke dhe turke në ishullin Imija/Kardak në Detin Egje, për sovranitetin e së cilës diskutojnë Athina dhe Ankaraja. "Porosia jonë është e qartë. Greqia nuk do të lejojë, pranojë ose tolerojë çfarëdo provokimi drejt integritetit të saj territorial", porositi Cipras. Duke potencuar se kufiri detar i Greqisë në Detin Egje, gjithashtu është edhe kufiri i BE-së, Cipras shtoi se "provokimet dhe retorika agresive ndaj të drejtave sovrane të një shteti anëtar të BE-së, janë të drejtuara edhe ndaj të gjithë Unionit". Në lidhje me përplasjen e dy anijeve të hënën, Ankaraja dhe Athina në mes vete e hedhin përgjegjësinë për incidentin, duke potencuar se ai ka ndodhur në "ujërat e tyre territoriale". Për shkak të Imija/Kardak, Greqia dhe Turqia në vitin 1996 ishin para fillimit të luftës.
|