Takim i kryeministrave të Kosovës dhe Malit të Zi, Haradinaj - Markoviq

Prishtinë, 18 prill 2018 (MIA) - Kryeministri i Kosovës, Ramush Haradinaj në një postim në Fejsbuk ka njoftuar se sot është takuar me kryeministrin e Malit të Zi, Dushko Markoviq, ku ka thënë se marrëdhëniet me Malin e Zi janë të shkëlqyeshme.
Kosova dhe Mali i Zi kanë treguar korrektësi sa i përket bashkëpunimit ndërshtetëror. Në jemi të përkushtuar që ky bashkëpunim të vazhdojë dhe kemi një agjendë të njëjtë, që do të jetë rruga jonë evropiane, tha kryeministri Haradinaj, pas takimit bilateral me kryeministrin malazez Markoviq.
"Kryeministrin e Malit të Zi e përgëzova për zgjedhjen e presidentit të ri, Milo Gjukanoviq. Jemi të lumtur që ky vend zgjodhi një president që ka aspirata të njëjta me vendin tonë, familjen evropiane dhe miqësinë e përhershme me SHBA-të. Vizioni ynë si Kosovë është që të thellojmë raportet miqësore, fqinjësore, ekonomike dhe politike me Malin e Zi. Ky vend ka treguar gatishmëri ta ndihmojë Kosovën në proceset tejet të rëndësishme nëpër të cilat ka kaluar vendi" ka thënë Kryeministri Haradinaj.
Për Kryeministrin Markoviq, Kosova mbetet një nga vendet me të cilat duhet intensifikuar bashkëpunimi ekonomik dhe partneriteti politik, fusha këto për të cilat Mali i Zi do të përkushtohet që të avancohen, derisa mbështet Kosovën në rrugën e saj evropiane.
Kryeministri i Kosovës dhe ai i Malit të Zi, njofton RTK, gjatë takimit diskutuan edhe për projektet e përbashkëta infrastrukturore, rrugën që lidhë Kosovën me Malin e Zi, për hekurudhën që përshkon Bjello Polen - Berane - Pejë, për mbështetjen e komunitetit malazez në Kosovë dhe atij shqiptarë në Malin e Zi dhe shumë projekte të tjera të rëndësishme për të dyja vendet.