Shqipëria këtë sezon turistik më e pastërTiranë, 21 prill 2018 (MIA) - Gjatë gjithë sezonit turistik Shqipëria do të jetë shumë më e pastër, deklaroi ministri i Turizmit dhe Mjedisit, Blendi Klosi gjatë punës për pastrimin e plazhit në Vilë Bashtovë të Rrogozhinës në kuadër të "Javës së Tokës".
Klosi tha se puna e bërë gjatë këtyre ditëve do të vijojë edhe pas datës 22 prill për të mbajtur pastër çdo plazh gjatë sezonit turistik. Lidhur me problematikat e tjera mjedisore ai tha se do të punohet intensivisht në çdo plazh, falë edhe një plani të detajuar me prefektët dhe kryetarët e bashkive. "Falë edhe aksionit “Pastrojmë Tokën që duam”, ne arritëm që të dëshmojmë që Shqipëria mund të jetë shumë e pastër dhe sezoni turistik në vitin 2018 do të jetë sezoni më i pastër turistik. Padyshim ka shumë punë të tjera në këtë plazh që kanë të bëjnë me menaxhimin dhe sigurinë e plazhit, ka të bëjnë me derdhjen e ujërave të zeza, kanë të bëjnë me problematikat mjedisore të vetë plazhit dhe gjithë bregdetit por për të gjitha këto së bashku me prefektët dhe kryetarin e bashkisë kemi një plan të detajuar që gjatë gjithë sezonit të verës do të kemi një punë intensive në çdo plazh të vendit", tha Klosi.
|