Kuvendi i Kosovës miratoi rezolutë sipas së cilës referendumi është joligjorPrishtinë, 16 shkurt 2012 (MIA) – Dje në Kuvendin e Kosovës, u miratua një Deklaratë në kundërshtim të referendumit të serbëve të mbajtur dje e pardje në katër komuna me shumicë serbe në veri të Kosovës. Deklarata u miratua me 64 vota për dhe me 9 abstenim, kundër nuk kishte.
Me këtë Deklaratë referendumi serb në veri shpallet i paligjshëm dhe jokushtetues.
Miratimit të Deklaratës i ka paraprirë një debat i gjerë i deputetëve Kuvendit.
Në bazë të nenit 65.1 të Kushtetutës së Republikës së Kosovës dhe të nenit 6 paragrafi 1 dhe 49 të Rregullores së Kuvendit të Republikës së Kosovës, Kuvendi, me propozimin e Grupeve parlamentare, miraton Deklaratën, në të cilën thuhet:
1. Kuvendi i Republikës së Kosovës e kundërshton dhe e shpall të paligjshëm e të pavlefshëm Referendumin e strukturave paralele në komunat veriore të Kosovës, të financuara e të drejtuara nga Republika e Serbisë kundër Pavarësisë, Sovranitetit dhe Integritetit territorial të Republikës së Kosovës.
2. Kuvendi i Republikës së Kosovës e vlerëson këtë referendum cenim të rendit juridik dhe kushtetues të Republikës së Kosovës;
3. Kuvendi i Republikës së Kosovës konstaton që i ashtuquajturi Referendum i organizuar nga strukturat ilegale, nuk prodhon asnjë efekt juridik, politik dhe si i tillë është i pavlefshëm;
4. Organizimet e tilla jashtë institucionale dhe ilegale dëmtojnë përpjekjet e vazhdueshme të Institucioneve të Republikës së Kosovës për integrim të komunitetit serb në jetën institucionale;
5. Kuvendi i Republikës së Kosovës inkurajon komunitetin serb të pjesës veriore që sa më shpejtë të angazhohet në implementimin e Propozimit Gjithëpërfshirës për zgjidhjen e Statusit të Kosovës.
6. Institucionet e Republikës së Kosovës konfirmojnë gatishmërinë e tyre për mbrojtjen dhe respektimin e të gjitha konventave ndërkombëtare, që garantojnë liritë dhe të drejtat e qytetarëve, si dhe të drejtat e pakicave.
|