Berisha mbështet qëndrimin e Qeverisë kosovare ndaj referendumit të paligjshëm të serbëveTiranë, 16 shkurt 2012 (MIA) - Kryeministri i Republikës së Shqipërisë, Sali Berisha, mbështet plotësisht qëndrimin e Qeverisë së Kosovës ndaj referendumit të paligjshëm të serbëve në Komunat e Veriut të Mitrovicës.
Nëpërmjet një deklarate të publikuar në faqen e Këshillit të ministrave, Berisha nënvizon se "ky akt i pavlerë dhe pa konsekuencë, për sa i përket integritetit territorial dhe sovranitetit të Republikës së Kosovës, është vepër e strukturave paralele dhe qarqeve të Beogradit që i mbështetin ato. Ai ka si qëllim mbajtjen në rend dite të një skenari të rrezikshëm, që synon ndryshimin e kufijve ekzistues, sipas linjave të pastërta etnike në rajonin tonë".
Kryeministri Berisha shprehet se, respektimi i kufijve aktual të Ballkanit, është i një rëndësie themelore për paqen, stabilitetin, bashkëpunimin rajonal dhe integrimin Euroatlantik dhe Europian të kombeve dhe vendeve tona.
|