Mbi 200 të vdekur nga shpërthimi në një minierë në Turqi (PLT)Stamboll, 14 maj 2014 (MIA) - Numri i të vdekurve pas shpërthimit në minierën në qytetin Soma në qarkun Manisa në Turqi arriti në 201 njerëz. Rreth 80 janë lënduar, por numri më i madh i njerëzve janë të ngujuar në minierë. Këtë e deklaroi ministri turk i Energjetikës Taner Jilldiz.
Sipas ministrit, 787 minatorë kanë qenë në minierë kur ka ndodhur fatkeqësia.
Rezultatet e para janë se fatkeqësia është shkaktuar nga një shpërthim që është paraqitur si pasojë e dëmtimeve në trafostacion. Pastaj ka shpërthyer edhe zjarr. Ekipet e shpëtimit gjithë natën morën pjesë në aksionet për shpëtimin e të mbijetuarve.
"Lidhur me operacionet e shpëtimit mund të them vetëm se shpresat tona për shpëtim të personave të rinj po zvogëlohen", deklaroi Jilldiz.
Fatkeqësia ka ndodhur kur punonjësit janë përgatitur për ndërrim. Këtë e shpjegon numri i madh i minatorëve në minierë. Zjarri në minierë ende është aktiv - 18 orë pas shpërthimit.
Qindra të afërt të viktimave gjatë gjithë natës mbetën para minierës në pritje për aksione të suksesshme për shpëtim.
Miniera në Soma është më i madhi në rajonin e Manisës. Në të punojnë rreth 6.500 persona. Kjo është tragjedia më e madhe që ka ndodhur në një minierë turke.
Ministria e Punës dhe Politikës njoftoi se miniera pesë herë është kontrolluar nga viti 2012 deri më tani. Kontrolli i fundit ka qenë në mars të këtij viti dhe nuk janë regjistruiar probleme për kushtet për punë dhe për siguri.
Opozita në Turqi njoftoi se Partia qeveritare e Drejtësisë dhe Zhvillimit paradokohe ka hedhur poshtë një propozim të tyre për fillim të hetimit parlamentar për serinë e incidenteve në minierat rreth Somës.
|