Prishtinë, 15 tetor 2014 (MIA) - Jakup Krasniqi, i është kundërpërgjigjur reagimit të shefit të diplomacisë serbe, Ivica Daçiq, që ky i fundit ka bërë lidhur me ndërprerjen e ndeshjes së mbrëmshme mes Serbisë dhe Shqipërisë.
Sipas Daçiqit akti i valëvitjes së flamurit të Shqipërisë së Madhe me dy ikonat kombëtare, Ismail Qemailin e Isa Boletinin e ka provokuar palën serbe dhe se tani pret se si do të reagojë Bashkimi Evropian dhe UEFA.
Siç shkruan "Koha Ditore" ish-kryeparlamentari përmes Fejsbukut, deklaratës së Daçiqit se Serbia nuk mban asnjë përgjegjësi për ndërprerjen e kësaj ndeshje, i përgjigjet:
"Po Serbia nuk mban përgjegjësi për shkatërrimin e Jugosllavisë! Nuk mban përgjegjësi për politikat shfarosëse të gjenocidit të ndjekura nga Serbia e Federata Jugosllave në Kosovë, nuk mban përgjegjësi për luftërat shkatërrimtare të zhvilluara në Kroaci, Bosnje e Hercegovinë dhe në Kosovë.
Serbia nuk është fajtore për shovinizmin e egër që kultivohet nga udhëheqësit serb edhe sot e kësaj dite. Serbia nuk ka faj pse nuk ka kurajo ta pranojë botërisht fajin për gjenocidin e ushtruar në hapësirat e ish Jugosllavisë.
Serbia, nuk ka faj për barbarinë e ushtruar mbi lojtarët shqiptaër dhe jo vetëm nga huliganët e shfrenuar, por edhe nga ata që duhet t’i mbronin lojtarët e ekipit të Shqipërisë.
Sipas logjikës suaj: Flamuri i shqiptarëve dhe i Shqipërisë nuk bën të valojë mbi Beograd, ndërsa flamuri i Serbisë mund të valojë gjithandej nëpër Kosovë?!
Ju që nuk mund ta pranoni fajin e shkaktuar në një ndeshje futbolli, kur do ta pranoni fajin për gjenocidin e shkaktuar kundër të gjithë jo serbëve në hapësirat e ish Jugosllavisë? Ju nuk mund ta përmbushni asnjë vlerë evropiane.
Ne jemi të bindur se Serbia, e udhëhequr nga nxënësit dhe bashkëpunëtoret e Millosheviqit, nuk mund të merr dhe as duhet të marrë rrugëtimin drejt integrimit në vlerat evropiane", përfundon Krasniqi.