Haradinaj: Do të bëhem kryeministër, askush nuk mund të më ndal

Prishtinë, 14 nëntor 2014 (MIA) - Lideri i Aleancës për Ardhmërinë e Kosovës (AAK), Ramush Haradinaj sot pasdite në Deçan i demantoi shkrimet e disa mediumeve kosovare se pozitën kryeministër në qeverinë e ardhshme të Kosovës ia ka lëshuar liderit të Lidhjes Demokratike të Kosovës (LDK), Isa Mustafa.

"Unë jam më së miri i pozicionuar, unë jam në qendër dhe nuk kam hequr dorë nga kandidatura për kryeministër. Ata që dëshirojnë të më pengojnë në këte do të dalin humbës", deklaroi Haradinaj, i cili pranoi se mes tij dhe përfaqësuesve ndërkombëtar ka disa mosmarrëveshje, por se ato kanë të bëjnë vetëm me përbërjen e qeverisë së re.

Siç lajmëroi korrespodenti i MIA-s, ai pohoi se liderët e koalicionit LVAN (Isa Mustafa, Albin Kurti, Ramush Haradinaj dhe Fatmir Limaj) sonte do të takohen që të bisedojnë rreth kërkesës së Partisë Demokratike të Kosovës (PDK) që t'i jepet vendi i kryetarit të Parlamentit, e për këmbim të formojnë qeveri.