Kuvendi i Shqipërisë sot voton për arrestimin e deputetëve Doshi e Frroku

Tiranë, 26 mars 2015 (MIA) -  Kuvendi i Shqipërisë sot do të shqyrtojë kërkesën e Prokurorisë së Përgjithshme që kërkon autorizimin e Parlamentit për arrestimin e dy deputetëve - Tom Doshi dhe Mark Frroku, të akuzuar për dëshmi të rreme.

Kërkesa e organit të akuzës është pika e parë e rendit të ditës së seancës, që parashikon votimin e raportit të Këshillit të Mandateve për këtë çështje.

Siç njoftojnë mediat vednore, dje në mbrëmje, pak para mesnate, Këshilli, nën drejtimin e nënkryetarit të Kuvendit, Vangjel Dule, vendosi me konsensus t’i hapë rrugën arrestimit të dy deputetëve, mbështetur në kërkesën e organit të akuzës.

Procedura parashikon paraqitjen e raportit të hartuar nga Këshilli, si dhe mbajtjen e fjalës nga deputetët e akuzuar.