Tramp e ndërroi Tilersonin, Pompeo sekretar i ri i Shtetit (PLT)

Uashington, 13 mars 2018 (MIA) - Presidenti amerikan Donald Tramp e ndërroi sot sekretarin amerikan të Shtetit, Reks Tilerson në momentin e negociatave të paralajmëruara me Korenë e Veriut.
"Majk Pompeo, drejtor i CIA-s, do të jetë sekretari ynë i ri i Shtetit. Prej tij presim punë fantastike. Xhina Haspel do të jetë drejtoreshë e re e CIA-s dhe gruaja e parë në këtë pozitë. Urime!", shkroi Tramp në "Tuiter".
Në krye të CIA-s është emëruar Xhina Haspel, zëvendësdrejtoreshë e deritanishme.
Sipas një përfaqësuesi anonim të Shtëpisë së Bardhë, presidenti i SHBA-së dëshiron të ketë ekip të ri para negociatave të planifikuara me Korenë e Veriut dhe negociatave të ndryshme tregtare.
Tilerson, ish-drejtor ekzekutiv i Ekson Mobile e kreu funksionin e sekretarit shtetëror pak më shumë se një vit.
Drejtori i CIA-s Majk Pompeo me rastin e emërimit theksoi se është falënderues që presidenti Tramp i ka dhënë shans të shërbejë si drejtor i CIA-s dhe për mundësinë që të shërbejë si sekretar i Shtetit".
"Lidershipi i tij e bëri SHBA-në të sigurt dhe gëzohem që e prezantoj atë dhe popullin amerikan para gjithë botës. Puna me njerëz të mëdhenj në CIA të cilët janë nëpunës shtetërorë më të avancuar dhe më të talentuar me të cilët u takova, ishte një nder i madh në jetën time", shkroi Pompeo në kumtesë.
Xhina Haspel e cila është femra e parë e emëruar për drejtoreshë të re të CIA-s deklaroi:
"Pas 30 viteve punë në CIA, kam nderin që isha zëvendëse e Majk Pompeos në vitin paraprak. Jam mirënjohëse për mundësinë e dhënë nga presidenti Tramp dhe besimin që ai pati tek unë që të më zgjedhë për drejtoreshë të re të CIA-s".

Presidenti Tramp deklaroi se ai dhe Tilerson "kohë të gjatë kanë biseduar" dhe nuk janë dakorduar për çështje siç është marrëveshja me Iranin.
Një përfaqësues i lartë i Departamentit të Shtetit deklaroi se Tramp nuk i ka shpjeguar Tilersonit se pse është ndërruar.
Nënsekretari shtetëror për diplomaci publike, Stiv Goldstajn, thotë se Tilerson "ka pasur qëllim që të qëndrojë" në vendin e punës, për shkak se ka konsideruar se po përparon në sferën e sigurisë kombëtare.
Dy përfaqësues nga Shtëpia e Bardhë pohojnë se Tilersonit i është thënë se që të premten se do të ndërrohet, por Goldstajn thotë se "Tilerson nuk ka folur me presidentin dhe nuk është njoftuar për arsyen për ndërrimin e tij", njoftojnë mediat amerikane.
Tilerson u kthye nga udhëtimi i shkurtër në Afrikë para publikimit të Trampit, në të cilin ai nuk dha shpjegim për vendimin.