Uashington, 17 korrik 2014 (MIA) - SHBA-ja vlerëson se Rusia "është duke rrezikuar shumë" që vendet e Perëndimit t'i vendosin sanksione shtesë, nëse Moska nuk e ndryshon politikën e saj ndaj Ukrainës, deklaroi në konferencë për shtyp sekretari i Shtëpisë së Bardhë, Xhosh Ernest, para se lista amerikane me sanksione të zgjerohet me funksionarë të rinj dhe kompani dhe banka të mëdha ruse.
Përfaqësuesi i administratës së presidentit amerikan shprehu brengosje për atë që Rusia nuk ndërmerr aktivitete të nevojshme për zgjidhjen e krizës së Ukrainës, që "për Moskën krijon rrezik që të jetë cak i izolimit ndërkombëtar shtesë dhe të ballafaqohet me pasoja më të mëdha ekonomike" për shkak të kësaj politike, transmeton ITAR-TASS.
Ernest theksoi se SHBA-ja është e gatshme të ndërmarrë hapa shtesë për përforcimin e presionit ndaj Rusisë.
Më vonë, Ministria e Financave amerikane kumtoi se në mënyrë të konsiderueshme janë përforcuar sanksionet ndaj Rusisë për shkak Ukrainës, duke përfshirë masa drejtuar industrisë ruse, kompanive energjetike dhe institucioneve financiare.