Pilaj: Operacionet izraelite mund të interpretohen si krime lufte

Gjenevë, 23 korrik 2014 (MIA) - Komisarja e OKB-së për të Drejtat e Njeriut, Navi Pilaj, ka thënë se Izraeli ka mundësi që është duke kryer krime lufte në Gaza, kur shkatërrimi i shtëpive dhe vrasja e fëmijëve është në kundërshtim me ligjin ndërkombëtar.

Pilaj e ka hapur një debat emergjent në Këshillin e të Drejtave të Njeriut në Gjenevë, gjatë së cilit i ka dënuar edhe sulmet me raketa të Hamasit ndaj Izraelit.

Ajo ju bëri thirrje palëve të involvuar në konfliktin e armatosur në Rripin e Gazës të bëjnë dallim midis civilëve dhe pjesëmarrësve në veprimet ushtarake.

Ajo theksoi se nga tetë korriku, nga fillimi i operacionit izraelit në Rripin e Gazës janë vrarë mbi 600 palestinezë prej të cilëve 147 fëmijë dhe 74 gra.