Xhihadistët janë dëbuar nga pjesa më e madhe e Kobanes

Damask, 16 tetor 2014 (MIA) - Komandanti i forcave kurde në Kobane, Baharin Kandal sot kumtoi se luftëtarët e tij kanë arritur t'i dëbojnë xhihadistët nga grupi Shteti islamik (SHI) nga pjesa më e madhe e këtij qyteti sirian, që ndodhet në afërsi të kufirit me Turqinë.

"Sulmet ajrore amerikane mundësuan një zhvillim të këtillë të ngjarjeve. SHI tani mban vetëm dy "xhepa" në lindje të qytetit", deklaroi Kandal për BBC-në, duke shtuar se forcat kurde po marrin ndihmë në armatim, pajisje dhe njerëz, por refuzoi të cekë se prej kujt.

Komanda e forcave të SHBA-së kumtoi se aeroplanët amerikanë sot kryen 14 sulme ndaj pozitave të SHI-së në rajonin e Kobanes.

Luftëtarët e SHI-së gjatë verës morën territore të mëdha në Siri dhe Irak, ku vendosën ligje të Sheriatit dhe po zbatojnë  likuidime masovike dhe dëbime.