Sulme ajrore mbi objekte të naftës në provincën siriane Deir al ZurBejrut, 23 tetor 2014 (MIA) - Koalicioni ndërkombëtar, i udhëhequr nga SHBA-ja, sot ka kryer katër sulme ajrore mbi objekte të naftës në provincën lindore siriane Deir al Zur, e cila gjendet në kufirin me Irakun.
Aktivistë të të drejtave të njeriut në Siri, thonë se prej se ka filluar fushata e sulmeve ajrore, janë vrarë 553 militantë islamikë dhe 32 civilë.
Observatori sirian për të drejtat e njeriut me bazë në Britani, ka thënë sot, se shumica e të vrarëve, 464 prej tyre janë militantë të Shtetit Islamik.
Sulmet ajrore në Siri, po ashtu kanë vrarë 57 anëtarë të Al Nusra, degë e Al Kaidës.
Dje, Parlamenti i rajonit kurd në Irak, ka miratuar propozimin për dërgimin e trupave kurde irakiane në Kobane të Sirisë, për të ndihmuar kurdët atje të cilët po luftojnë me militantët e SHI-së.
Në fillim të kësaj jave, ushtria amerikane ka paralajmëruar se militantët e SHI-së, vazhdojnë të jenë ‘kërcënim’ për Kobanen, por luftëtarët kurdë kanë nën kontroll pjesën më të madhe të qytetit.
|