Kandidati për kryeministër italian akuzohet për falsifikim të biografisë Romë, 22 maj 2018 (MIA) - Kandidatin të cilin Lëvizja anti-institucionale Pesë yje (M5S) dhe partia populiste e krahut të djathtë Liga e propozuan për kryeministër të ri italian, Xhozele Konte, akuzohet për falsifikimin e biografisë profesionale dhe për ekzagjerimin e arritjeve të tij shkencore. Dyshimet u shfaqën pasi që ishte vënë nën dyshim arsimi i tij akademik në Universitetin e Nju-Jorkut. Zëdhënësja e Universitetit në deklaratën për "Nju Jork Tajms" pohon se "person me emër të tillë nuk figuron në asnjë nga regjistrat universitar, as si student e as si ligjërues". Ajo thekson se është e mundur Konte të ketë ndjekur kurse njëditore ose dyditore në Universitet, pjesëmarrësit e së cilave nuk janë evidentuar në arkiv. Pretendimet e tilla shkaktuan dyshime edhe në besueshmërinë e pohimeve në biografinë e Kontes se ai ka vizituar më shumë institucione të arsimit të lartë jashtë vendit. Ndaj këtyre akuzave reagoi Lëvizja M5S e cila deklaroi se Konte "asnjëherë nuk ka thënë se ka kryer kurse konkrete apo se ka fituar titullin magjistër nga Universiteti" në Nju-Jork. "Konte si çdo njeri i cili merret me shkencë ka shkuar jashtë vendit për të studiuar, për t'i thelluar njohuritë e tij dhe për të përsosur njohjen e drejtë të gjuhës angleze. Shtypi ndërkombëtar dhe italian janë të frustruar nga disa kualifikime për të cilat Konte asnjëherë nuk ka pohuar se i posedon", qëndron në kumtesën e M5S. M5S dhe Liga dje kërkuan nga presidenti italian, Sergjo Matarela të emërtojë Konten për mandatar për përbërjen e re të Qeverisë së Italisë.
|