Putini paralajmëroi se Ukraina është në prag të luftës civileMoskë, 16 prill 2014 (MIA) - Presidenti i Rusisë, Vladimir Putin, ka tërhequr vërejtjen se Ukraina gjendet "buzë luftës civile". Presidenca ruse ka thënë se këto komente Putin i ka bërë gjatë bisedës telefonike me kancelaren gjermane, Angela Merkel, për situatën në Ukrainë. Këto komente u bënë disa orë pasi forcat e armatosura të Ukrainës e rimorën kontrollin ndaj një baze të vogël ajrore në pjesën lindore të këtij vendi, ku separatistët prorusë, në nëntë qytete, i kanë okupuar ndërtesat qeveritare dhe kapacitetet e tjera. Presidenti i përkohshëm i Ukrainës, Oleksandr Turçinov, tha se baza në Kramatorsk ishte "çliruar". Sipas raporteve, një tjetër operacion "antiterror" po zhvillohet në qytetin e afërt Sllovjansk, megjithëse ende ka shumë pak detaje. Qeveria e SHBA-së e ka përshkruar përgjigjen e autoriteteve të Ukrainës ndaj situatës "së paqëndrueshme" në pjesën lindore, si të "rregullt".
|