Shtajnmajer: Gjermania nuk do të marrë pjesë në sulmet ndaj SHI-sëBerlin, 22 shtator 2014 (MIA) - Ministri gjerman i Punëve të Jashtme, Frank-Valter Shtajnmajer deklaroi se vendi i tij nuk do të kyçet në çfarëdo lloj sulmesh ajrore apo ofensive tokësore në luftën kundër organizatës ekstremiste Shteti islamik (SHI) në Irak.
Shtajnmajer theksoi se Gjermania si anëtare e koalicionit ndërkombëtar në luftën kundër pjesëtarëve të SHI-së në Irak dhe Siri, i kryesuar nga SHBA-ja, ka përgjegjësi, por se nuk do të ndërmarrë rol të rëndësishëm.
"Vendimi i Berlinit për të siguruar armë për luftëtarët kurd të cilët luftojnë kundër SHI-së nuk u soll lehtë", deklaroi Shtajnmajer për servisin publik gjerman ARD, duke shtuar se Gjermania nuk është nën presion që t'u bashkangjitet SHBA-së dhe Francës në sulmet ajrore në territoret e kontrolluara nga SHI.
|