Obama: Vrasja e Nemcovit shenjë për përkeqësimin e klimës në Rusi

Uashington, 3 mars 2015 (MIA) - Vrasja e politikanit opozitar rus, Boris Nemcov është shenjë për përkeqësimin e klimës në Rusi, ku "të drejtat civile dhe liritë e medieve kanë ngecur viteve të fundit", deklaroi presidenti i SHBA-së, Barak Obama.

"Kjo njofton për klimën brenda Rusisë, ku shoqëria civile, gazetarët e pavarur dhe njerëzit të cilët po përpiqen të komunikojnë në Internet, gjithnjë e më shumë ndjehen të ekspozuar në kanosje dhe kufizime. Gjithnjë e më shumë informacionin e vetëm të cilin opinioni rus mund ta marrë është përmes medieve nën kontrollin shtetëror", tha Obama.

Ai bëri thirrje për hetim gjithëpërfshirës me rastin e vrasjes së Nemcovit.

Vrasja e Nemcovit është "pjesë e asaj që unë mendoj se i mundësoi Rusisë të angazhohet për njëfarë lloj agresioni të cilin e ka ndaj Ukrainës", theksoi Obama.