Ekonomia e Finlandës e preku fundin - 14 për qind më pak eksport në Rusi

Geteborg, 3 mars 2015 (MIA) - Finlanda, ekonomia e së cilës po zvogëlohet tani më tre vite me radhë, e preku fundin. Sipas ekspertëve të bankës "Nordea", pritet rimëkëmbje ekonomike në Finlandë pas përafërsisht gjysmë viti, me ndihmë stimuluese nga vendet e huaja, lajmëroi korrespondenti i MIA-s nga Geteborgu.

Një lajm i mirë është se BPV-ja finlandeze tani me siguri e ka prekur fundin, theksohet në raportin e "Nordea"-s në të cilin analizohen pikëpamjet e shtetit finlandez në tregun e bonove.

Finlanda, Qeveria e koalicionit e së cilës është formuar jashtë blloqeve partiake-politike, po përgatitet për zgjedhje parlamentare më 19 prill, fillimisht ka probleme me stagnimin e eksportit.

Eksporti në Rusi pësoi ulje prej 14 për qind, si pasojë e sanksioneve për shkak të konfliktit në Ukrainë dhe kundër-sanksioneve të vendosura nga ana e Moskës.

Përveç kësaj, është e pranishme edhe konsumi i dobët vendor në Finlandë, përderisa konsumi nuk i tejkalon nivelet nga viti 2008. Vlerësimet pesimiste negativisht reflektohen në investimet dhe në lëvizjet e tregut të punës, shkruan "Svenska dagbladet".

Ndihmë stimuluese për dalje të ekonomisë finlandeze nga recesioni pritet të vijë nga rritja e konsumit në SHBA dhe në vendet evropiane si Gjermania dhe Holanda.

Për momentin parashikimet për rritjen ekonomike në Finlandë në vitin 2015 ndryshojnë rreth zeros.