Paralajmërim për bllokadë në Bruksel për shkak të grevës së sindikatave

Bruksel, 30 mars 2015 (MIA) - Unioni i organizatave sindikale i Belgjikës për sot në kryeqytetin Bruksel caktoi demonstrata masive kundër rregullave më të ashpra të marrëdhënies së punës, që është paralajmëruar se do të vendosen nga ana e Qeverisë së re belge e kryesuar nga kryeministri Sharl Mishel.

Siç lajmëron korrespondenti i MIA-s nga Brukseli, për shkak të këtyre demonstratave në të cilat përfshihen edhe të punësuarit në sektorin e transportit publik, transporti publik në Bruksel do të ndërpritet.

Siç publikuan nga fronti sindikal belg, koncentrimi i demonstruesve duhet të jetë te stacioni Luksemburg në afërsi të Parlamentit Evropian, ndërsa lëvizja do të zhvillohet në rrugën kryesore evropiane Art-Loa, ku gjenden Komisioni Evropian dhe Këshilli Evropian, por edhe ku gjendet Qeveria e Belgjikës dhe zyrat e kryeministrit Mishel, ku do të jenë protestat qendrore.

Një pjesë e protestave veçmë kanë filluar në mëngjes, por rreth pasdites pritet protesta e përgjithshme, me ç'rast pritet ngecje e plotë e komunikacionit në qendër të Brukselit midis orës 11:00 dhe 13:00. Përveç metrosë, autobusëve dhe tramvajeve në Bruksel sot nuk do të qarkullojë edhe komunikacioni hekurudhor, sepse edhe të punësuarit në hekurudhë parashtruan paralajmërim për grevë.