Arrestohet ish-shefi i FMN-së për pastrim parash

Madrid, 17 prill 2015 (MIA) - Ish-drejtori i FMN-së, spanjolli Rodrigo Rato,është arrestuar nën akuzat e ‘mashtrimit’, ‘pastrim parash’ dhe ‘fshehje të pasurisë’.

Rato (66) u arrestua në shtëpinë e tij ditën e djeshme, ndërsa pas urdhërit nga Gjykata e Lartë në Madrid autoritetet kanë kryer edhe kontrolle në banesën e tij.

Ai ishte ministër i Financave në Spanjë në qeverinë konservatore të Hose Maria Aznar. Rato drejtoi FMN-në nga viti 2004 deri në 2007-ën. Ndërkohë në vitin 2010 ai u bë drejtor i “Bankia”, një konglomerat bankar, me 12 milionë klientë, ndërsa dy vjet më vonë dha dorëheqjen për shkak të ecurisë jo të mirë.

Sipas prokurorëve, drejtuesit e "Bankia", ku përfshihet edhe Rato, mashtruan në lidhje me financat e bankës. Gjithashtu ata janë akuzuar edhe për keqpërdorim të kartave të kreditit, në kohën kur drejtues ishte Rodrigo Rato.