Takim i Forcave mjekësore ballkanike në ShkupShkup, 10 shkurt 2016 (MIA) - Takim pune në të cilin është folur për statusin, planet, detyrat dhe obligimet e forcave mjekësore ballkanike dhe vendet të cilat janë përfshirë në projekt u mbajt sot në Ministrinë e Mbrojtjes. Në takim morën pjesë ministri i Mbrojtjes, Zoran Jolevski, zëvendësshefi i SHM-së së ARM-së gjeneral, Muhamet Racaj si dhe përfaqësuesit e ministrisë dhe ARM-së.
Ministri i Mbrojtjes Jolevski në takimin e punës me përfaqësuesit e Forcave mjekësore ballkanike, sot porositi se Forcat mjekësore ballkanike janë projekt i rëndësishëm për Maqedoninë dhe rajonin dhe se i paraqet nder që të jetë nikoqir i këtij projekti i cili zhvillohet në frymën e mbrojtjes së mençur.
Siç theksohet në kumtesën e Ministrisë së Mbrojtjes, një prej momenteve kyçe për zhvillimin e projektit është nënshkrimi i "Marrëveshjes së Forcave mjekësore ballkanike" në janar të këtij viti. Në takim është konstatuar se ajo që pason është ratifikimi i Marrëveshjes, me ç'rast projekti edhe zyrtarisht do të fillojë të funksionojë. Selia e Forcave mjekësore ballkanike do të jetë në Shkup.
Nisma "Balkan Medical Task Force (BMTF)", gjegjësisht "Forcat ballkanike mjekësore" është projekt i inicuar nga Mbretëria e Norvegjisë dhe SHBA. Vendet pjesëmarrëse të rajonit të përfshira në projekt janë Maqedonia, Shqipëria, BeH, Sllovenia, Serbia dhe Mali i Zi. Qëllimi i projektit është përmirësimi dhe aftësimi i kapaciteteve mjekësore nacionale për punë në kuadër të njësitit rajonal multinacional, përforcimi i kapaciteteve ushtarako-mjekësore për mbështetjen e bashkësisë civile dhe aftësimin e shërbimeve nacionale ushtarako-mjekësore për ndërtimin e kapaciteteve të standardizuara me nivel të lartë të interoperabilitetit në rajon dhe me OKB, NATO, BE dhe Partneritetit për paqe.
|