Protesta e opozitës që përçau opozitën

Protesta e sotme në Shkup te organizuar nga Këshilli opozitar, dhe në të cilën morën pjesë partitë opozitare shqiptare Besa, Uniteti, RDK, LRPDSH, PPD, duket se më shumë se e ka bashkuar, ka përçarë opozitën.

Protesta e cila u përkrah masovikisht nga qytetarët shqiptarë, shkaktoi thyerje mespartive opozitare për shkak të mospërfaqësimit të drejtë në fjalimet që duhet të mbaheshin para protestuesve.

Portali Albeu mëson se sipas marrëveshjes, para qytetarëve duhej të flisnin vetëm dy përfaqësues të Këshillit Opozitar, edhe atë Orhan Murtezani dhe Kim Mehmeti ndërsa jashtë marrëveshjes është shfaqur në skenë edhe Bilal Kasami nga Besa, i cili ka mbajtur një fjalim.

Por, ky veprim ka shkaktuar pakënaqësi te katër partitë e tjera të pa përfaqësuara në fjalime.

Pakënaqësia është shprehur hapur edhe në rrjetet sociale ku vërehen akuza të rënda mes simpatizantëve të katër partive opozitare në adresë të Besës. /albeu.com/