Tetovë, 29 dhjetor (MIA) - Statusin e institucionit publik-privat, joprofitabil të lartë arsimor, të cilin këtë vit e fitoi Universiteti i Evropës Juglindore është shënim kryesor i vitit që kalon, vlerësoi sot rektori Alajdin Abazi.
"Programet e akredituara studimore 3+2 dhe oferta e programeve studimore vetëm në gjuhën angleze, lëshimi në përdorim i laboratorive për teknologjinë informatike, hapja e programeve të disperzuara studimore në Shkup, janë vetëm një pjesë e sukseseve të cilat i arriti Universiteti këtë vit", tha Abazi në takimin para vitit të ri me gazetarët.
Për vitin e ardhshëm prioritete kryesore do të jenë zgjerimi i programeve studimore në Shkup, thellimi i partenritetit me universitetet nga Evropa, hapja e studimeve të doktoraturës. Por, sipas rektorit, prioritet kulmor është ruajtja e cilësisë së studimeve dhe qëndrueshmërisë afatgjate financiare.