RDK i dërgon telegram ngushëllimi familjes XhaferiShkup, 16 gusht 2012 (MIA) - "Me keqardhje dhe pikëllim pranuam lajmin për ndarjen nga jeta të politikanit Arbën Xhaferri. Në këto momente të dhimbjes për familjen Xhaferi, Rilindja Demokratike Kombëtare ndan pikëllimin me familjarët e të ndjerit duke vlerësuar se mungesa e tij në skenën politike shqiptare në Maqedoni do të jetë evidente", thuhet mes tjerash në telegramin e ngushëllimit të RDK-së.
Arbën Xhaferin, shqiptarët gjithmonë do ta mbajnë mend si një politikan dhe njeri me ndikim në rrjedhat politike shqiptare në Maqedoni dhe më gjerë.
Sfidat e politikës shqiptare në Maqedoni që ishin motiv dhe përkushtim i angazhimit të Arbër Xhaferrit në politikë, janë sot po aq aktuale sa edhe në kohën kur Arbën Xhaferi u inkuadrua aktivisht në politikën shqiptare në Maqedoni.
"Me këtë rast, në emrin tim personal dhe në emër të Rilindjes Demokratike Kombëtare, anëtarëve të familjes, miqve dhe bashkëpunëtorëve të tij, u shpreh ngushëllimet tona më të sinqerta", thuhet në telegramin e ngushëllimit të kryetarit të RDK-së, Rufi Osmani.
|