Naumovski ia dorëzoi letrat kredenciale ObamësUashington, 20 nëntor 2014 (MIA) - Ambasadori i sapoemëruar i Republikës së Maqedonisë në Shtetet e Bashkuara të Amerikës, Vasko Naumovski dje në Shtëpinë e Bardhë u takua me presidentin e SHBA-së, Barak Obama, të cilit ia dorëzoi letrat kredenciale.
"Gjatë takimit të shkurtë, presidenti Obama e theksoi gatishmërinë për bashkëpunim të mëtutjeshëm ndërmjet dy vendeve dhe më dëshiroi mandat të suksesshëm në Uashington. Unë, me atë rast, u falënderova për mbështetjen nga ana e SHBA-së, të treguar gjatë 20 viteve të kaluara, dhe e theksova edhe përcaktimin e Republikës së Maqedonisë për zgjerim të bashkëpunimit në disa sfera", deklaroi ambasadori Naumovski pas takimit.
Naumovski arriti në Uashington para dy javëve, që do të thotë se Shtëpia e Bardhë relativisht shpejtë e organizoi pranimin e letrave kredenciale. Zakonisht për këtë mund të pritet edhe nga disa muaj.
Naumovski, i cili është edhe negociues në kontestin për emrin me Republikën e Greqisë, paralajmëroi se prioritet i tij gjatë punës në Uashington do të jetë dinamizimi i marrëdhënieve politike, organizimi i ngjarjeve për tërheqjen e investimeve amerikane në Maqedoni me promovim të zonave teknologjike, industriale dhe shëndetësore, promovim të turizmit dhe avancim të bashkëpunimit në mbrojtje, siguri, arsim, shkencë dhe kulturë.
|