Shqipëria mund Turqinë në miqësore në Antali

Antali, 13 nëntor 2017 (MIA) - Kombëtarja shqiptare e fudbollit sot zhvilloi ndeshje miqësore me Turqinë në Antali, me ç'rast shënoi fitore me rezultatin 3:2.
Kombëtarja e drejtuar nga Kristian Panuçi e nisi mjaftë mirë takimin duke rrezikuar portën dhe duke luajtur në sulm që nga fillimi.
Shqipëria gjeti golin në minutën e 24-të me Armando Sadikun. Ishte Odise Roshi ai që kreu punën dhe harkoi bukur për të, ndërsa Sadiku me një goditje të fort mposhti portierin Babaxhan.

Shqipëria e dyfishon epërsinë në minutën e 39-të, kur në zonë harkon Roshi, ndërsa me kokë shënon sërish Sadiku.
Pas golit të dytë kuqezinjtë mbetën me një lojtar më pak pasi Ledian Memushaj u ndëshkua me kartonin e dytë të verdhë.
Pjesa e parë u mbyll me këto shifra, ndërsa me të filluar pjesa e dytë turqit gjetën golin. Ishte Cengiz Under që shënoi nga afërsia për 2-1.
Por Shqipëria nuk hezitoi të përgjigjet. Sadiku pranoi një top në zonë, u pengua nga mbrojtësit, por topi erdhi te Grezda i cili me një goditje precize me kthim shënoi për 3:1.
Turqit u kthyen sërish në lojë pasi Emre Akbaba e gjeti rrjetin pas një aksioni të bukur.
Kështu Shqipëria shënoi fitore të madhe kundër një kundërshtari mjaftë cilësor.