Fitore e Skënderbeut kundër gjigantit ukrainas, Dinamo KievKorçë, 24 nëntor 2017 (MIA) - Ekipi i Skënderbeut nga Korça shënoi fitoren e parë në kuadër të Ligës së Evropës, duke mposhtur Dinamon nga Kievi me rezultatin 3:2. Të parët që shënuan ishin mysafirët nëpërmjet mesfushorit ofensiv Tsygankov, në minutën e 16-të, pas asistimit nga Morozyuk. Por, epërsia e ekipit ukrainas zgjati vetëm 60 sekonda, pasi Skënderbeu arriti të barazonte rezultatin. Gjergji Muzaka asistoi tek Sabien Lilaj, i cili me një goditje të fuqishme nga rreth 25 metra, shënoi dhe barazoi rezultatin në 1:1. Me rezultatin 1:1 përfunduan 45 minutat e para të kësaj sfide. Por, pjesa e dytë për korçarët nisi edhe më mirë, pasi arritën të shënonin vetëm pas shtatë minutave lojë. Gledi Mici harkoi për mrekulli në zonë ndërsa Sowe asistoi me kokë tek James, i cili shënoi nga afërsia për 2:1. Vetëm katër minuta më vonë, klubi bardh e kuq shënoi edhe golin e tretë në këtë sfidë. Enis Gavazaj asistoi bukur tek Ali Sowe, i cili pasi kaloi edhe portierin mysafir shënoi për 3:1. Ndërkohë, golin e dytë për mysafirët e shënoi zëvendësuesi Rusyn në minutën e fundit. Fitorja e parë Skënderbeun e ka ngritur në pozitën e tretë në Grupin B, me pesë pikë të tubuara pas pesë ndeshjeve.
|