Destro u pajtua të kalojë tek Milani

Milano, 29 janar 2015 (MIA) - Sulmuesi italian i Romës, Mattia Destro, më në fund ka pranuar ofertën e Milanit, ku do të huazohet për gjashtë muaj me opsion blerje.

Destro (23) ka qenë në bisedime me Rossonerët disa javët e fundit, me Adriano Gallianin që e vizitoi atë në Romë së fundmi në përpjekje për të arritur marrëveshje.

Mediat italiane, përfshirë kanalin zyrtar të Milanit, raportojnë se marrëveshja tashmë është arritur, edhe pse ende nuk ka ndonjë komunikatë zyrtare nga klubi.

Italiani mendohet se fillimisht do të transferohet në San Siro në formë të huazimi për 700 mijë euro, derisa transferimi do të bëhet i përhershëm gjatë verës për 15 milionë euro.

Destro do të nënshkruajë kontratë pesëvjeçare me Milanin (deri në vitin 2020) nga e cila do të fitojë 2.5 milionë euro në sezon, veç bonuseve.