Во теорија Шпанското ГП носи најмалку изненадувања од  која било друга трка на формула 1 календарот. Тимовите се на патеката толку често, што сите подесувања на менувачот се познати, сите нивоа на надолна сила се искалкулирани и секое однесување на кривините е познато. Единствен непредвидлив елемент е ветерот кој може да ја наруши деликатната аеродинамика на модерните Ф1 болиди. Тоа значи дека речиси сигурно ќе видиме 2х2х2 старт во Каталонија (со Ферари, Мекларен и БМВ).

Ова е трка на која стартува кампањата против расизмот во спортот, но ова паѓа во сенка на наци-секс скандалот на шефот на ФИА, Макс Мозли. Кампањата стартуваше откако неколку идиоти фанови на Фернандо Алонсо расистички го напаѓаа Луис Хамилтон, а самиот Алонсо не помогна велејќи дека ги разбира нивните фрустрации.

Но, во моментов Фернандо Алонсо има поважни работи, да направи нешто повеќе со многу лош болид. Алонсо вели дека ќе остане во Рено, но додава дека “како што видовме лани, договорите се флексибилни”. Лука ди Монтеѕемоло излезе минатата недела и изјави дека нема место за Шпанецот во Ферари додека Раиконен е тука, а Раиконен носи тоа што ветува.

Пред една година Фернандо пристигна на својата домашна трка со можности да стигне до трета титула по ред. Оваа година тој ќе се мачи да биде на подиумот.

Ферари ќе се обидат да ја консолидираат својата позиција како најдобар тим оваа година и би требало да се види само кој црвен болид ќе биде на врвот. Маса беше убедливо побрз од Раиконен во Бахреин и двете патеки се многу слични. Лани Маса успеа да го задржи Алонсо на првата кривина, но сега на таа позиција ќе бидат сигурно неговиот колега или Роберт Кубица.

БМВ Заубер покажаа дека можат да се борат со големите момци, Ферари и Мекларен, но Рон Денис верува дека кога тимовите се вратија во Европа, брзината на развојот на болидите ќе види одвојување токму на Ферари и Мекларен. Историјата покажува дека Заубер секогаш имале силен старт на сезоната, по што полека паѓале во сенка, но тоа беше пред Марио Тајзен да ги поврзе супер-компјутерите на БМВ во овој тим.

Во средината многу е тешко да се прогнозира кој од Ред Бул, Тојота, Вилијамс и Хонда ќе ги добие квалификациите и можните поени. Поназад Себастијан Фетел ќе се обиде да добие малку километри откако имаше само неколку кривини во Австралија и Бахреин, додека Супер Агури се среќни што ќе можат да ги имаат отворено своите гаражи.