Каунас, 14 септември 2011 (МИА) - Со победата над Литванија во четврт финалето на европското првенство, коршаркарската репрезентација на Македонија обезбеди пласман во полуфиналето и со тоа го постигна најголемиот успех во нејзината историја.
Во „Жалгирис арена“ во Каунас вечерва избраниците на селекторот Марин Докузовски беа подобри од домашната селекција на Литванија и победија со резултат 67:65.
Голема борбеност и пожртвуваност во дуелите со физички посилните Литванци покажаа сите македонски кошаркари кои добија можност да играат против фаворизираниот противник.
- Радувај се Македонијо! Шоуто не застанува овде!, беа првичните изрази на емоции на дел од македонските репрезентативци по големиот триумф.
Шпанија в петок ќе биде противник на Македонија во првата полуфинална пресметка на Еврошампионатот. Шпанците денеска во првото четвртфинале ја совладаа Словенија со 86:64.
Со влезот во големата четворка Македонија си обезбеди дополнителни натпревари на квалификациски турнир за Олимпијадата во Лондон идната година. Евентуален триумф во полуфиналето против Шпанија, освен обезбеден медал ќе значи и директно улество на кошаркарската репрезентација на Македонија на летните олимписки игри во Лондон.